2007年9月3日

利字當頭:點解,錢,唔係等一陣就有

孫柏文隻江銅到價,又碰巧三十歲生日,佢話要享受人生,所以決定休息……一日咁多。臨急臨忙,捉了我做替工,好彩剛巧,又同一位高人妙想天開炒友自由行機制,不如同大家一齊睇睇,究竟點先至可以畀同胞用人民幣炒港股,但又唔會畀人民幣大量流失。

炒友自由行五部曲

如果畀大陸銀行﹛將一綑綑人民幣換成港紙幫同胞買股票,睇怕唔使一頭半個月,香港周街都會係人民幣。

到時唔好話外管局頭痛,就連任Sir都怕畀人話特區違反基本法第111條第一句︰「港元為香港特別行政區法定貨幣,繼續流通。」

當然,香港物價穩定,亦係國家關注的問題;如果唔係,都唔會有供港食品價格限制,就唔會搞到香港人有錢無鮮肉食啦!

所以,就算有炒友自由行,都唔會係簡體版︰一手交錢一手交貨。

估計,炒友自由行應有五部曲(見圖)︰


1) 同胞將一綑綑人民幣,存入大陸銀行開自由行戶口,再畀指示炒起港股 (蘋果財經圖組又搞錯,用左港錢);
2) 大陸銀行將人民幣票據賣畀香港銀行,派人民幣利息;
3) 香港銀行再將人民幣票據,向心繫家國睇好人民幣升值香港及國際「散」戶;
4) 套現,就幫同胞買起晒港交所裏頭所有產品;
5) 買返來的貨,可以寄存響香港銀行呢邊。如果好彩股票生性,有息派,就兌人民幣匯畀同胞。

如此,大陸境外流通的,盡其量都只會是人民幣票據派的息口零頭;不過,大陸那邊,就可以將人民幣鎖死響銀行裏頭。

用呢招減輕通脹壓力,理論上都應該會比家陣那「存息高過貸息」有效。

只不過,先唔計究竟中行同中銀香港搞掂了交收結算系統未,淨係那些人民幣票據賣唔賣得,真係有些令人懷疑。

唔係話信唔過人民幣會企硬。不過,買得fixed-income者,都係精仔;而精仔自從花旗國信貸爆煲,都學會問︰「的cash-flow點生出來呢?」

一句人民銀行派街坊,又好似唔算幾實在;況且,鬼知大陸銀行有冇借孖展畀同胞,用高息做票據,到時真係有排驚囉。

咁耐都無水落,梗係有原因啦!