曾特首唔好誤解溫總溫總會見曾特首，話香港經濟社會發展有「深層次矛盾尚未根本解決」。曾特首順利完成述職之後見記者，補充話「矛盾」係指香港經濟轉型未完成，係因為三高︰高工資、高地價同高租金。
利世民聽完個心抽抽下，心諗︰「大件事，唔通香港又要走番老董舊政。」主觀願望當然希望係特首口快快，無心真係要打擊三高。老實講，八萬五既後遺症都未真正醫斷尾，如果再黎一次打擊三高，香港真係想唔和諧都唔得，不過係唉聲歎氣隻「鞋鞋聲」。
曾特首又解畫，話三高會影響競爭力。呢種講法同商會既得利益者立場有幾分似。曾特首有呢種諗法，一定係耳濡目染，聽得人家講多幾次就信以為真。如果三低就有競爭力，咁北韓競爭力就一定世界第一啦，又唔見商家湧去平壤投資！商家出口術要數，唔代表呢係真理。商家投訴三高，無非想政府畀著數，例如免費批地之類好處，而唔係真係要特首出手打擊三高，曾特首千祈、千祈、千祈唔好搞錯，唔係香港真係有難。
溫總心繫貧困家庭
香港有三高，係因為香港非常之有競爭力，所以人工、地價同租金先至會高。不過話說回頭，香港經濟體系走高增值路線，冇錯係會有貧困家庭好難一時間適應。利世民同溫總唔係好熟，但係一聽就知溫總「矛盾論」所指，就係講呢個問題。北京高官向來都唔鍾意將說話講得太白，但係溫總噚日好心畀曾特首一個大「貼士」。
溫總公開高度評價述職何厚鏵，話澳門經濟增長都係其次，最值得驕傲一件事係澳門教育改革。溫總係做大事睇大局勢人，佢深深明白教育係助人脫貧之本。香港教育使錢最多，但社會得出係大量雙失青年，貧者愈貧，呢咪就係「矛盾」！
溫總一番講話，其實係要曾特首搞掂教育，幫貧困家庭力爭上游。曾特首，呢個訊息你收到未？
