從減電費到發大達講開香港電費，差唔多全城都只得一個答案︰「貴！」
普遍不滿情緒，令到爭取減電費成為一個完全沒有政治風險既立場。政客公開要兩家電力公司考慮民生，電力公司又可以點樣回話？「減價對唔住股東」、「利潤管制已經賦予電力公司加價權力」等等理由，無錯係事實，但政客玩既係另一套規則，好聽就叫依從民意，難聽一點就叫民粹。
當然，如果電力公司本身沒有道德包袱，又邊使怕民粹政治。所謂利潤管制協議，其實就係政府畀電力公司壟斷市場，而且保證肯定投資回報率。喂，必定賺錢喎！點解個利潤協議唔係同我簽？點解個發財機會唔係我？點解要係中電同港燈？一句講晒，電力公司幫唔落。
減幾多先至夠？問政客就一定話減多多都唔夠，呢種行為思想一的都唔公道。老實講，政客都唔可以當市民無知，要求減價都要有個合理既基準。用政治主導價格問題，就係百分百民粹，用政策去決定價格，定義叫做計劃經濟，兩個都係唔應該既方法。政客捨易取難，寧願漫無目的叫減價口號，都唔肯實實際際爭取將兩電聯網。唉！如果出口術可以有效，呢個世界就真係和平，又幾時輪到街頭政客領功。
其實只要有競爭，你估兩電唔會鬥平鬥服務？電訊服務既例子已經證明開放競爭，俾消費者有選擇係促使服務供應商減價最直接既方法。政客要真正幫市民爭取減電費，第一步應該做點功課研究如何供電和發電，因為呢個先係聯網同引入更多競爭既關鍵。
靠政府發達的方程式
政客唔明市場運作，政務官亦唔識做生意，佢地識就唔從政啦！佢地天真以為唔係必賺就無人投資，所以特別容易俾人搵笨。其實就算如利世民之流，只要有利潤管制協議咁既必賺保證，閒閒地集資一兩千億根本唔係難題。
各位如果諗到有邊的行業又諗到個理由去游說政府畀個壟斷加利潤保證權，都唔好話唔肥仔！自從17世紀開始，皇室御准同政府保護既專利壟斷，一直係股民最愛。香港過往成功例子亦有電力、港交所同公共交通運輸，相信日後環保同廢物處理都有的潛質。利世民人如其名利世民，今日將呢條發達方程式公之於世，當做2006新年禮物，祝各位好運！
