我要TABOR
自從利世民上個月提出香港納稅人權益約章TABOR（Taxpayers'BillofRights)，有不少好友紛紛來電，問世民有無同政黨傾過，認為TABOR對爭取香港民主發展好大幫助。當然政黨正忙於政改辯論，邊有時間理得咁多事！而且TABOR呢家先進思維，要好一段日子先有可能醞釀成功。況且無普選又何來限制行政霸道，睇要到香港到2012年先可以諗下TABOR。
事實上，香港中產好矛盾。一方面香港中產都好希望盡快落實港人治港，而且更加想改變政策左左右右的傾斜；另一方面，香港中產又好怕普選會令到政策傾斜更嚴重。TABOR唔分左右，限制政府開支增長唔可以快得多過經濟增長，唔怕大花筒政府。
香港本來可以做得比美國更好
雖然香港《基本法》107同108條，基本已經係一種TABOR，不過曾蔭權1999年「解釋」︰「只要在中期內恢復平衡預算，短期出現財政赤字並不違反基本法。」結果家滅赤目標是08/09，原來中期足足長達10年。美國科羅拉多州議會1992年通過TABOR，限制政府收入增長並且規定政府要將所有盈餘退回市民。在TABOR通過之後，科羅拉多州全美減稅最多，而且退稅的金額每年增加。有麝自然香，美國已經有16個州計劃將TABOR納入憲章。
TABOR成績實在有目共睹。不過，科羅拉多州TABOR用通脹計算，香港有聯繫匯率，用通脹做標準好危險。香港改進版可以用國民生產總值計，即係經濟增長幾多，政府收入同支出就最多可以增長幾多，而且用剩要全數還富於民，選民無可能唔支持。要抗衡民粹，就要所有人一齊感受到公共財政的壓力，無必要靠永遠剝削香港人投票權咁極端先做到。TABOR可以話係民粹防火牆，民主派要贏中產支持，就要認真研究TABOR。利世民
