學校冇教的資本論利世民擔心香港人失去創業精神，昨日呼籲大家為下一代著想，唔好再嚇怕小朋友，不去了解市場運作。點知一早老友來電反問世民︰「創業環境今時唔同往日，要既資金上落千萬美金計，如果你唔係好疊水，邊度得咁多錢投資？」利世民唔怪呢位老友，因為佢幾十歲人都只係打工，未試過創業。無他，八九十年代香港有班中產移民，呢位老兄就坐上事業白金直升機，根本從來都唔使諗創業，佢唔明白創業係乜都好正常。
其實創業呢家野好公道，就算你有億萬家財，一盤生意捉錯路就註定冇運行。遠既例子唔講，就同各位重溫科網潮同生化潮。心水清既朋友一定記得香港土產「得金」同埋乜乜物物生命科技。開始時雷聲大，依家毛毛雨都唔多滴。人家唔係冇資金後台，只不過做開地產唔識做第二瓣，其實畀佢有再多錢都係丟落鹹水海。做生意唔係一味鬥錢多，依家我地講緊點搵錢，唔係講點使錢。使錢有邊個唔識？
人人都有資本
好多人搞錯左資本同資金，以為有錢就做乜生意都得。老實講，就算遍地黃金任你執，你都要識得同人爭先得，如果唔係就只有份睇人發達。其實資本唔等於錢，最重要既資本係一盤生意靈魂。如果盤生意係執遍地既黃金，你既資本可能係一雙快手，甚至乎係不怒而威既眼神。
現實生活中，資本可以係時間、朋友、知識、樣貌、健康甚至運氣，問題係你識唔識得將呢的野，轉變為實在既經濟價值。以前有一種行業叫做「通天經紀」，佢地日日廣結善緣，將朋友之間既需要聯繫起來，中間賺小小佣金，朋友同知識就係資本。依家呢個行頭叫做「顧問」，有好多做得成功顧問都變成跨國企業！邊個話呢個世界唔可以做無本生意！
讀書時候學校老師唔會教人點樣創業，今日就等利世民點醒你，記住天生我材必有用！與其浪費時候抱怨自己父母唔係大地產商，不如將時間精神用來諗下自己有乜過人之處，然後諗下點樣創一番事業，最緊要係諗下你既長處可以點樣幫到人，諗諗下一盤生意就成形，一次唔得就黎多次，個個成功創業既人都經歷過呢個階段，連大地產商都唔例外。
