報業風起雲湧時今日中環最熱門話題，就係《信報》賣盤既消息。不過正所謂春江水暖鴨先知，報紙市場有幾惡搞，點都唔到中環友扮專家。當然來者用心亦唔係我地呢的尋常百姓可以理解得到！欲知後事如何，就惟有等下回分解。
利世民聽完班中環友既言論，覺得佢地當正《信報》係曼聯，而小小超就係 Malcolm Glazer。可以肯定一樣野，就係林老先生同曹老前輩兩位既招牌，一定至少同《信報》既招牌一樣咁值錢。如果只係買《信報》又唔買埋呢兩位前輩，咁就同買曼聯唔要費格遜一樣，捉到鹿唔識脫角也。
中環友講黎講去，都離唔開媒體老闆既政治立場同私人利益。利世民無咁好氣同佢地討論呢一個虛疑問題，因為去到最後，呢的杞人憂天既諗法都係自己嚇自己居多。
讀者先係老闆
中環友自視高人一等，視其他讀者無腦乎？如果有人違背市場原則，講埋的唔三唔四既野，好快就會畀讀者離棄。當然，有報紙真係完全唔計較賺唔賺錢，不過事實係佢地又唔係好多讀者播！中環友係唔係諗得太多呢？講到底，讀者先至係一份報紙既真正老闆。
其實報紙又神奇又神聖。以今時今日互聯網既普及，報紙重有生存空間確係神奇。利世民覺得市民買報紙，除左想睇新聞之外，最緊要係買記者同編輯既專業操守同眼光，呢樣就係報紙神聖之處，唔係一般網站可以一時三刻建立得到。辦報紙要唔少投資，係一種承擔，亦係報紙公信力一種來源。重有一點就係，讀者買一份報紙，其實係支持緊一把講佢心底話既聲音，呢個亦都係蘋果日報既精神。
反而利世民最擔心者，係報紙難搵錢。前輩遲唔賣早唔賣，偏偏依家至賣，睇怕都係覺得生意唔再好做。老實講，人家曼聯賣盤關我鬼事咩？踢緊車路士既利世民，最驚係的人唔睇英超轉睇西甲者！
