2006年1月12日

積金為將來?

積金為將來?

張萊可以係一個虛構人物,亦可以真有其人,其實呢點並唔重要。張萊今年20歲,華資企業文員月入2萬,已經係文員界的打工皇帝。好彩既話,即係如果張萊未來45年都唔會失業,亦假設強積金唔蝕本,張萊65歲退休可以得到一筆一百幾十萬既積金。

不過,45年後既一百幾十萬,又可以使幾耐呢?假設香港可以好似夢想之中而美國聯儲局將通脹限制在2%,45年後100萬都只可以當今日40萬使。精算師同風水師都話張萊最少有85歲命,亦即係話張萊每個月都有千零蚊使下,所以積金幫唔到張萊,而且張萊仲要身體健康先得。

章來係雜工,今年20歲,其實這點並不重要。章來無供強積金,亦都搵唔夠錢供強積金,所以積金更加幫唔到章來。積金又幫唔到張萊,又幫唔到章來,咁究竟積金係為既邊個「將來」?

強積金為蔣徠!

蔣徠又可以係一個虛構人物,亦可以真有其人,其實這點亦不重要。蔣徠今年都係20歲,在一間投資銀行任特別總裁負責強積金管理,月入20萬,是投資銀行界的明日之星。雖然個市好既日子,蔣徠管理既基金行得比人慢;個市差既日子,佢管理既基金又跌得比人快,不過佢先至係銀行中收入最穩定既一個,所以佢已經打算45歲退休,跟手做兼職非專業高爾夫球手。

認命啦香港人!如果你唔係蔣徠,而係張萊或者章來,就注定積金幫唔到你。

咪住!香港人幾時話要積金幫?重要係「強」積金?利世民中文唔好,識得以「強」字為首既名詞得兩個,一個係「強盜」,一個係「強積金」,至於動詞方面,就識得「強迫」、「強搶」同「強姦」,「強X」似乎都唔係好,唔怪得政府作口號個陣,特登飛走個「強」字啦,變「積金為將來」。

事實亦都證明,要「強」迫至積既金,回報又差過人,管理費又貴過人。視乎你從邊個角度睇喇,強積金係完全違反市場規律既產品重可以幫銀行賺錢,都算幾「強」。

算啦,馬局長放過張萊同章來啦!多個錢,買股票又好,買輪又好,買樓又好,輸左都心甘命抵。輸左強積金都唔知搵邊個蔣徠算帳?話晒都係政府「強」佢積金,如果張萊退休的「強」積金唔夠使,係唔係問馬局長你拎番先?