發電供電 鬧劇一場

發電供電　鬧劇一場

發電供電本來係一個沉悶不堪既行業，多得老謀深算既局長、楚楚可憐既公主CEO同氣勢磅礡既靚太高層，香港人多左免費娛樂。不過利世民唔知足，覺得如果佢地演技可以更上一層樓，對香港既演藝界絕對可以有正面影響。

先講公主CEO，佢後台勁就不在話下，可惜佢既劇本太單薄。佢既假想敵係兩大壟斷商，要打入香港電力市場都算係一場硬仗，唔洗番兩三百億點鬥呢？公主CEO獨白就話要籌集「一個億」去起電網同買電。「一個億」連買電芯都唔得啦！究竟係邊鬼個編劇寫埋的咁幼稚既獨白？呢套明明係爾虞我詐連續劇，寫到好似兒童故事，又叫人點入戲？

劇本水平仍有待改進

開始時就話班市民要求減電費，之後局長就出黎順應民意，重加上環保條件，擺明係開天殺價。

正路發展就係靚太高層反對然後膠著，經過一波三折最後戲劇性大團圓結局。

今次靚太高層同局長，兩位主角既戲份配合得好好，主角演技亦無懈可擊，惟獨係劇本太過表面化。編劇可能對市場運作認識唔深，所以先至會寫出有嚴重犯駁劇情。

首先，靚太高層反對降低保證利潤，人在其位講呢句說話好合理。不過靚太高層反對環保條件就奇怪的，因為政府開出苛刻環保條件，新競爭者就更難打入香港市場。站在靚太高層壟斷企業既立場，照理會食住環保工作大做文章，講下佢地公司又幾好幾犀利，又講下政府點解應該要畀佢地繼續服務九龍新界，甚至服務埋香港居民，乘機搶攻道德高地同埋市場佔有率。再講，無利潤保障靚太高層間公司一樣可以供電，而且更加無拘無束添，靚太高層又使乜驚青！靚太高層既獨白太過對抗，反而削弱劇情既可信性，編劇要好好修改呢部份。

至於局長，演技爐火純青不在講，最好野係可以面對公主CEO既演技竟然可以忍到唔笑，重可以繼續交足戲。呢的老戲骨係香港走一個少一個，政府要好好留住人才，唔好畀局長去左人家度打工先至係路。