亞當史密夫教書據說當年經濟學鼻祖亞當史密夫在格拉斯哥大學任教時，並沒有固定薪酬。佢每次開壇講學，都會係課室近出口處放一個錢箱，學生下課時自動自覺將學費放到錢箱中。
亞當史密夫唔係泛泛之輩，咁樣做當然有佢既理由。事實上，亞當史密夫用姜太公釣魚既收費模式，無非都係想要做到座無虛席，令到佢開既班受廣大學子歡迎。辦過講座既人都知，如果席上得小貓三四隻，再有猛料者表現都會大打折扣。所以先將演講廳坐滿聽眾，係一個聰明既做法。
當然，有人捧場係好，但係又點樣令學生乖乖交出銀兩呢？話說18世紀既時候，讀大學係有錢人專利，交學費唔係難事，最緊要係覺得值回票價。亞當史密夫教得好，學生捧場貴族安心，結果有大戶人家索性壟斷左佢，重金禮聘佢做私人教師。
好好反思教育
利世民講亞當史密夫既故事，無非都係想社會各界好好反省我地今時今日既教育制度。每一次講話要開放教育制度，要競爭要市場主導，憤世嫉俗既人就會大叫「學店、學店」，話會令到教育既內容偏埋一面。事實係咁咩？亞當史密夫教既係道德倫理學，就算當年都係偏門。即使今日外國既私立大學，亦唔見得市場主導既教育會令人偏埋一面。究竟呢的係擔心定係藉口？
今時今日教育已經普及化，要同時顧及低收入家庭既情況，所以學券制就係兩全其美既辦法。一方面，教師有自由去選擇教學既方法，另一方面學生有選擇自由，最重要係政府出錢唔出聲。照計呢個政策，教師都應該熱烈歡迎先至係，不過佢地似乎已經完全信晒大政府個套Propaganda，寧願畀官僚玩死都唔願意競爭。
我地既老師有無膽識好似亞當史密夫咁，教一堂書收一堂錢？對官僚政客來說這種收費模式會被批評為「對教育界人士的收入無保障」。最緊要既問題係︰教育係為左學生，定係為左老師？利世民最唔鍾意將事情放係非黑即白既對立面，我信有一個教育制度可以畀學生得益之餘老師又有成就感，亞當史密夫既故事就係最好例子，請各位老師對自己既能力有的信心。
