又畀次機會？
利世民今日出個謎，大家估下有乜野人會經常講︰「阿 Sir，畀次機會啦！下次唔敢！」學生出貓畀老師發現，唔踢出校都罰到驚啦！衝紅燈既小巴司機重大鑊，扣分扣得多分分鐘釘牌，畀人捉到都知死梗。正所為一次意外足以致命，出貓同衝紅燈都絕對無下次，佢地當然無可能「經常」講「下次唔敢」。
惟獨證券交易所既總裁，可以錯完又錯，錯完又錯。有禮貌既就認句錯，無誠意既連道歉都慳番！
依家唔係講孟加拉證券交易所，利世民講既係東京交易所同港交所。東京交易所舊年11月先至試過停市半日，結果一班高層齊齊自動減薪以示懲罰，但係結果唔夠三個月又出事。噚日東京交易所提早收市，理由係接唔晒的沽盤。第日升市犀利得滯又可以停市，咁真係乜野理由都可以要停市？你話日本股市重邊度信得過呢？
港交所「一年一大鑊」
香港都唔係叻好多，平均每年多過一單「蝦碌」。試過遲開市，又試過結算日收市前停市，又試過後備電力出事，又試過電腦程式有錯，又試過報價系統出錯，港交所當然話唔關佢事，一句遺憾，再加句「呢的個別事件唔會再發生」就算。大佬，個別事件當然唔會再發生啦！不過錯完又錯就唔可以當巧合。
香港同日本點解會一樣有個經常出錯既交易所？係唔係背後有的乜野相同之處呢？香港當年四交易所合一之後，鬧出停市4日既家醜！曾特首當年打大鱷之後更加將股票期指盡收一室，結果就係一年一大鑊。
經濟學家話有競爭先至有進步，唔長進就係因為無競爭。日本既本土行業出名排外，80年代人家好景，根本唔志外境外資金，所以日本既金融業更加係自己人小圈子玩意。依家日本仔要減交易所總裁人工，其實只不過想幫佢地保住份工。
利世民最唔主張叫人減薪，因為呢招無用。要搞活香港財金界，有乜野好得過開放市場引入競爭？NASDAQ點解唔可以係香港搞？人地點都好過我地半死不活既創業板啦！中國市場咁大，如果香港唔係畀人壟斷得咁厲害，我又唔信NASDAQ無興趣搞！
