郭伯偉爵士魂歸何處？
利世民心情沉重，因為世界上又少個偉人。郭伯偉爵士（Sir John Cowperthwaite 1915-2006）於1月25日辭世，享年九十有一。
由61到71年呢十年間出任香港財政司既郭伯偉爵士，唔算得上係一個真正家喻戶曉既名字。除左老一輩香港人同埋自由派既同道，重會對郭伯偉爵士津津樂道，大多數人都未必講得出呢一位香港大恩人既事跡。
對利世民黎講，郭伯偉爵士最值得令人敬佩既地方，係佢拒絕做黃大仙。為官者，大權在握，求財得財要勢得勢。老實講，扮黃大仙使阿公錢賺人情籌碼，乃人之常情，就連消毒藥水醃過既新加坡都有機會發生，更可況戰後既香港？
如果今日有人同政府講︰「我出錢起個甚麼文娛區，三十年後所有設施交畀政府，條件係政府免我地價再畀我起幾幢豪宅補數。」今日的官聽到呢的野，一定慌死財神會一個唔高興走人，君不見的官對西九依依不捨個種表情？
郭伯偉爵士又會點做？
不過香港就曾經出過一位偏偏唔明白人情世故既偉大財政司。如果換轉係郭伯偉爵士聽到呢的要求，利世民估佢一定會話︰「咁著數？呢個世界邊有咁大隻蛤蟆隨街跳？閣下要起乜又關政府乜事？唔該閣下投塊地番黎自己慢慢起到夠。重有，呢的設施多謝夾盛惠，千祈唔好要政府揹埋的無謂既維修管理，請閣下自己收拾殘局。」
利世民唔係憑空想像，話說當年財團要起海底隧道，郭伯偉爵士唔單止要商家出錢，重要佢地畀地租，打爛晒個算盤先講掂數。當然如果佢知道隧道交番畀政府之後的濕滯野，佢都唔會要條隧道，寧願繼續收地租好過。
可惜佢老人家在位只得十年，佢一走之後，香港就愈黎愈大政府。郭伯偉爵士之後既夏鼎基盡其量只不過是A貨一名，之後既財政司更加一蟹不如一蟹，結果咪搞到有的下三流貨色出黎用財政儲備入市炒股。
唉！郭伯偉爵士，你魂歸何處？
