新官上任聯儲局
正所謂一年之計在於春，每逢正月都係堪輿學家既旺季，其實早幾年開始已經有老外投資銀行將經濟預測同五行八卦合二為一，今年更加有本地財經演員加入呢個行列。至於呢的預測信唔信得過，就真係見仁見智。利世民雖然唔識風水，更加明白到未來既事係好難預測，所以能夠同廣大讀者分享，就只有一的傳統智慧。
自從七點八聯繫匯率將香港經濟同聯儲局政策綑綁，所有靠香港財經市場搵食者都要密切留意美國央行既一舉一動。新科聯儲局主席伯南克即將上任，但其實自從小布殊10月底宣布任命，市場就開始揣測今後聯儲局既方向，市場普遍認為伯君應該跟隨格老步伐，至少上任初期唔會有乜大動作。
未來既事邊個可以完全掌握？各位投資者千萬要小心呢類所謂「市場預期甚麼甚麼」講法。市場入面有千百萬人，又有邊個可以講得實「市場」諗緊乜？而且講市場走勢始終係用過去既數據分析未來，其實同風水佬講經濟一樣，未可盡信也。
股市日日開 機會日日有
近來美股港股雙雙大幅上升，而且每逢有反映經濟放緩數據，跟住個市就差唔多一定升。財經演員個套就一定話市場預期息率見頂，利好消息下資金入貨。其實呢個現象非常反智，經濟放緩企業盈利就一定唔好，盈利唔好股價又點可能有得升？而且有人入貨就有人出貨，又點可以講到形勢一片大好？
係呢個情況下，投資者又可以點樣為自己既財富打算？利世民建議有三點︰第一，千祈唔好再為有關利率上落既消息而盲目入市；第二，如果有懷疑亦都唔好盲目入市。記住股市日日都開，你唔會因為錯過一個機會而失去所有機會，但係一旦失去資金，就算明知有機會都惟有眼白白睇住人發達；第三，做足功課。炒乜都要識揀投資工具，搭錯車邊度都去唔到。最後，利世民響呢度祝願大家得心應手，增值創富。
