熱心大衛打低哥利亞話說市場上永遠都有恐龍公司，佢地唔單止大，重要阻住市場發展。不過自由市場入面，永遠都有新公司去挑戰恐龍，呢的係市場既自然現象，叫做創業。
創業者永遠都係要面對財雄勢大既對手，情況就好似故事裡面既大衛對哥利亞。當然，用一鋪蠻力去鬥冇話唔得，但係俾人打到遍體鱗傷又怪得邊個？當年大衛打低對手，靠既係睇準哥利亞既眉心命門射一粒彈珠。創業者面對大財團，一樣要快而準，唔可以用死力。
今日利世民要講既故事，係美國紐約一間叫做Glaceau飲品公司既發跡史。話說1996年初春某一日，有個34歲既後生Bikoff，屋企廚房搵左支樽裝水黎飲，剛好佢又想補充維他命C，就順手一片汽水餅含響口，忽然間佢就諗︰「點解樽裝水唔可以有維他命C？」一個諗頭就開始左呢位仁兄創業路。
八年變出三億營業額
市場上咁多產品，其實非酒精類飲品都算係最難開拓市場既一種。一來市場戰線長，3歲到80歲都可以係顧客，目標太多反而好難重點推銷；二來飲品分銷成本極高，如果超級市場賣重要畀上架費，真係未見官先打八十大板；三來對手財雄勢大，汽水界有紅藍陣營分庭抗禮，單係廣告開支已經係天文數字。
Bikoff睇準健康市場，知道有一班人嫌汽水冇益樽裝水冇味。開始既時候佢挨家挨戶去求小舖頭幫佢賣佢發明「健康水」。佢明知「健康水」同汽水冇得揮，所以特登要求舖頭老闆將佢「健康水」放響其他樽裝水旁邊。結果呢個策略非常成功，Glaceau八年內已經成為一間營業額三億五千萬美金既公司。邊個話大衛打唔低哥利亞？同Bikoff合作過既人，都話佢既優點係魄力充足，而且夠膽試新鮮方法。最重要係佢對人好有誠意，同佢合作既人最終都做埋朋友。原來做生意同做人道理都係一樣，要有好奇心有熱誠，打低哥利亞唔係難事。
