2006年1月3日

唔怕窮 最怕無機會

唔怕窮 最怕無機會

利世民攻打四方城多年,經驗話我知,手牌起手靚唔靚唔緊要,最緊要係打落去要入章。有人一見起手筒索萬子樣樣三四隻,即刻無晒心機,咁既心態加上一副先天不足既牌,想唔輸都唔得啦!積極進取者,就見一章打一章,其實13隻牌裡面,摸入四、五張,即刻唔同睇法。運氣再差既,死守唔出銃,等摸和洗牌再黎,呢先至係正確人生態度,長打長有。

元旦日,有班社工為兒童權益出聲。有個小朋友話︰「唔想再做童工」,呢的個案確實係「公關催淚彈」。不過同情還同情,利世民所擔心既唔係呢的小朋友有無得去學校旅行,或者有無錢去上課外活動,老實講呢的野對小朋友未來有幾大幫助我唔識評價,但係如果班小朋友自細已經認定自己係窮人,咁佢地就真係好難脫貧。

幾十年前,每個香港人都識講︰「工字不出頭」,賣鹹魚花生都算老闆仔。到七八十年代,的家長就會叫仔女︰「做專業人士啦,做生意呢家野唔到我地諗。」結果,做專業人士就變成香港中產既理想。到今時今日,小朋友耳濡目染既,又係一套點樣價值觀呢?

如果自細就俾人灌輸一套「你鬥唔過大商家」既思想,小朋友又點會有興趣去了解市場運作?當然唔係每一個小朋友都要立志成為老闆,但係依家既問題係好少好少人會諗自己有朝一日會做生意。《國際創業監察》調查發現,香港人創業動機全世界最低,好明顯香港已經無昔日個一份衝勁。

畀機會佢地做香港Bill Gates

現實係專業人士之路亦都愈來愈窄。做專業人士學講人脈,新移民家庭既小朋友又點夠香港中產家庭爭出位呢?佢地既無助可以理解。但係如果班小朋友自細已經抗拒了解市場運作,連最後一條路都斷埋,咁既局面又係唔係社會各界想見到既結果?

香港去到80年代,都重有白手興家呢支歌仔可以唱下,究竟係乜野原因令到的人唔再有心創業。創業最緊要係心態,30年前 Bill Gates 決定唔讀大學走去創業,佢第一個大客就係當時雄霸電腦業既IBM,今時今日邊個先係電腦業巨子唔使我多講。創業唔成功,唔好同我講話大企業壟斷!

利世民衷心呼籲,2006年我地唔好再教小朋友恐懼市場,等佢地都有機會成為香港Bill Gates,好嗎?