港台唔一定要用公帑議員同香港電台高層要懷疑政府受政治壓力干預香港電台編輯獨立，乃人在其位無可厚非，但佢地冇需要一竹篙打一船人，將所有商業原則運作既報章、雜誌、電台、電視通通一律講成政府喉舌。保飯碗還保飯碗，但係為乜無端端要抹黑市場呢？
利世民一向講事實，無錯港台唔少節目都有好高欣賞價值，但呢的成就並唔代表一定要由公帑找數先至做得出。既然議員同香港電台高層都當正市場係洪水猛獸，利世民就畀個非謀利獨立模式大家參考下。
美國人對政府非常之唔信任，亦都唔贊成政府搞傳媒。雖然美國無官辦電台電視台，佢地既 National Public Radio 同 Public Boardcast Service 就可以靠捐款運作，而且製作出黎既節目一都唔輸蝕。
利世民計過數，香港電台最貴既其實係電視部，佢地一年開支大概2億。呢個數目包括近600個鐘頭節目，一個鐘頭成本30幾萬，就當佢同地家電視台拆帳，應該可以收番七成以上成本。至於電台方面，七個電台其實每個鐘頭既成本只不過3000蚊樓下。
每70人一人每月捐$250
假設節目方針內容完全不變，按照依家既收聽收看率，香港電台係一個非常有吸引力既傳媒。就算要以廣告收入補貼運作，亦可以將廣告收益定一個上限，要廣告商排隊，淨係呢點都已經可以令香港電台中人繼續有飄飄然感覺啦！
其實要籌錢又有幾難呢？香港舊年有幾間比較有組織既慈善機構，佢地都籌到過億善款。香港電台有七個台加幾百個鐘頭節目，要籌款又有幾難呢？
假設合作籌款目標係3億，當中有一半同其他機構對分，只要香港每70人之中有一個忠實支持者願意每個月捐250元，香港電台就已經可以自負盈虧。
自負盈虧有乜好？香港電台以後永遠都絕對唔使再睇高官面色做人，乜呢個唔係佢地最希望既結局咩？
