2006年1月5日

年年考第一又如何

年年考第一又如何

每年1月美國智囊機構傳統基金會都會在港公布世界最自由經濟排名榜。點解一間美國智囊偏偏要千里迢迢來港公布排名?因為香港年年考第一,人家咪要來港好好恭賀一番。其實香港已經連續12年獲得呢個殊榮。傳統基金會推呢個排名,最終目的係要向美國政府施加壓力,一方面改革美國本土政策,另一方面就要對症下藥去打開落後國家既經濟封鎖。對香港黎講,其實只不過叫做有多個好消息幫手沖喜下,排名其實象徵意義大過一切。

開頭幾年利世民同的高官一樣,對呢個「第一」都有的與有榮焉既感覺,而且每年都會擔心究竟下一年香港會唔會失去呢個殊榮。直至到有一年,利世民有機會同負責編制排名既研究員傾偈,先至知道其實唔使擔心太多,因為如果香港唔係「第一」,咁新加坡就會係「第一」。對美國人黎講,新加坡始終比香港差幾皮,而且李光耀既大名佢一聽就怕怕。要畀新加坡做第一,咁咪等於要佢地叫美國政府學新加坡?No Way!

塞爾特之虎勢兇夾狼

利世民已經睇化哂,亦都唔怕香港會有朝一日失去「第一」榮耀。世界要有競爭先至有進步。如果香港唔再係世界最自由經濟體系,咁只不過代表有人做得好過我地,應該戥人家高興先岩。近年傳統基金會排名之中有兩個明日之星大家要留意留意,一個叫做愛莎尼亞,一個叫做愛爾蘭。

愛莎尼亞係世界上第一個推行單一稅率制(Flat Tax)既國家,而且自從2000年開始,企業只要將所賺錢既再投資,呢部份盈利就就唔使交利得稅,到真正將盈餘袋入袋先要交稅。結果,愛莎尼亞成為歐洲最高增長地方,而且係東歐既資訊科技重鎮。大家唔好忘記,愛莎尼亞係1991年先由前蘇聯分裂出來,至今只不過短短15年。

愛爾蘭既稅率亦低到無人有,成個90年代平均利得稅只係12.5%,連自詡奉行低稅率既香港都自愧不如。80年代愛爾蘭係西歐最窮既國家,唔夠20年已經變成全歐洲第三富庶國家,而且依家仍然係最高增長國家添。今日既愛爾蘭人稱塞爾特之虎(Celtic Tiger),可以同亞洲四小龍爭一日之長短。

話說每年傳統基金會公布排名之前都有一個早餐會。今年個早餐會上所有人都告誡︰「香港千祈唔好加稅。」歐洲二愛既成功,專家認為秘訣得三隻字︰「低稅率」,希望唐英年會學到野。