2006年1月10日

專利壟斷股秘笈

專利壟斷股秘笈

利世民記得第一日寫呢個專欄,題目叫做《通脹鴿派遙控香港經濟》,如今不過70天,恆指就一浪高過一浪,睇黎市場已經當正加息周期就黎完結。如果當日有聽利世民呼籲做好倉,應該都有些少斬獲。

不過炒市唔係人人都得,因為要有耐性加上對自己眼光要有極度信心,先至可以炒市,如果唔係賺埋都唔夠買驚風散。前輩教落,學睇市不如學揀股,所以利世民就將自己既心得同大家分享下,等大家多條路搵餐晏仔都好。揀岩股睇錯市,大不了等低潮過後又一條好漢;揀錯股睇岩市,人人有錢賺但係斯人獨憔悴既感覺一的都唔好受;揀錯股睇錯市,除了止蝕還是止蝕。

揀股第一步,就係要明白政治。由股市出現第一日開始,所有股民最愛都離唔開有專利同壟斷。專利除左正正當當申請既發明專利,重有政府御賜既專利經營權。有專利經營權既公司長?長賺,不過要小心,專利過後永遠都係痛苦既現實。

小心駛得萬年船

當年香港電訊係全港資產值最高既公司,的人以為資產係指地底電線。錯!錯!錯!人家最重要既資產係專利經營權,電訊業開放其實就已經係清倉訊號。對待專利股,最緊要記住以前交易所主席名言︰「唔好同股票談戀愛。」無論以前派息幾好幾準,一定唔可以留戀,要分手便分手。通常專利巨無霸既殞落,就好似天文學上面恆星既滅亡一樣,會先黎一次巨大爆發,股價不斷上升同埋傳出新投資者入股收購既消息,股民一旦樂極忘形高追買錯貨,往往恨錯難返。

政府開放市場,曾經擁有專利經營權既大股東都會意興闌珊諗出路,另一方面市場上往往都會有收買佬因為其他原因睇中呢的「舊船」,可惜呢的收買佬通常都唔夠現金,要蛇吞象就惟有出一招乾坤大挪移,用股票換股票。如果交易之後股價上升,買賣雙方就可以出貨等現金回籠。

嘩!做市犯法架喎!利世民唔係話人家做市。好多時呢大動作,都會撞岩另外一個更加死傷慘重市場現象︰泡沫。依家大陸鬧電慌,香港政府又講緊電力市場改革……如果大家手上有相關股票朋友,記緊一句︰小心駛得萬年船!